FOKUS - gerecht gewënnt !

Eise Fokus

Bass du net an dengem Engagement an der Gesellschaft vun anere Parteien ugesprach, da komm zu Fokus.

Vill Biergerinnen a Bierger fillen sech an hirem Engagement an der Gesellschaft an an hirem Bekenntnis zu eisem Staat net méi vun de klassesche Parteien ugesprach.

Si wëllen sech net ideologesch banne mussen, fir Verantwortung ze iwwerhuelen.

All déi Mënschen heescht Fokus wëllkomm, all déi Mënsche wëlle mir an ons Aarbechtsgruppe mat abannen, wann si déi selwecht Approche zur Politik hunn, déi selwecht Wäerter an Iwwerzeegungen deelen an déi selwecht Loscht op Verännerung hunn.

Neel mat Käpp

Komm mir sichen no Léisungen déi sech net am Detail verléiere mee e grousse politeschen Entworf duerstellen, deen am Respekt vun alle Mënschen am Land, hirer Liewenssituatioun an hirer Liewensleeschtung entwéckelt gëtt.

Et soll net méi laang “gekuckt, gemengt, studéiert, analyséiert, gepréift an ugeduecht ginn”, mee endlech nees: gemaach. An ze villen Domaine ass vill Zäit vergaangen, ouni datt kloer Ziler erreecht goufen.

Dat betrëfft eise Schoulsystem, d’Strukturen an d’Institutioune vum Staat, d’Steierlandschaft, de Logement an d’Mobilitéit.

Eng staark Gesellschaft

Mir sinn der Iwwerzeegung, datt eng aner Politik méiglech ass. Eng déi versicht all d’Mënschen am Land ze erreechen, an si mathëlt.

Eng, déi däitlech mécht, datt de Rechtsstaat sech net a Fro stelle léisst, an datt jiddereen an der Gesellschaft net just Rechter, mee och Flichten huet, an datt jiddereen och een Deel Verantwortung fir all déi aner dréit.

Eng, déi Engagement fërdert, sief et an der Famill, am Veräin, an der Suerg ëm déi méi Schwaach, an engem neien nationalen Déngscht oder an der kommunaler a nationaler Politik. Eng Politik, déi eng wierklech Biergergesellschaft entstoe léisst, déi sech net iwwer Konsum definéiert, mee iwwer Participatioun.

Fortschrëtt

Mir wëllen déi grouss Erausfuerderunge vun eiser Zäit mat Determinatioun a mat Courage ugoen.

Mir gesinn den technologeschen a wëssenschaftleche Fortschrëtt dobäi als wichteg Viraussetzung fir d´Erausfuerderungen déi sech Lëtzebuerg, Europa an der Welt stellen ze meeschteren.

Dofir muss d´Fuerschung ënnerstëtzt ginn an d´Wësse vun de Fachleit an dem politeschen Discours eng méi grouss Bedeitung kréien.

Fir d´Erausfuerderunge kennen unzegoen, brauch et e grousse politesche Konsens an d´Ënnerstëtzung vun der breeder Gesellschaft.

contact@fokus.lu

Kontaktéiert eis iwwer EMAIL
Eis Büroen sinn op vun
Méindes - Freides : 9:00 - 17:00
Samschdes a Sonndes si mir zou
Eis Adress
69, rue de l'Êglise
L-4552 Niederkorn
contact@fokus.lu

WebMaster Gary Kneip & Claus Nehring

Fokus Newsletter